الموضوع

 

الموضوع بدأ بسيط.. أول شهر نقلنا فيه سوا.. "نايثن" وقع ازازه الفاونديشن وهو بيجيب ماكينة الحلاقة بتاعته.. طبعًا الإزازة اتكسرت 100 حته واللي جواها بهدل الدنيا.. يومها فضل يعتذر لي جامد جدًا ويقولي إنه ماكنش شايفها..

كب مج القهوة بتاعه على بلوزتي البيضا الجديدة وهو بيحضني وأنا رايحه الشغل وقالي "انا اسف أوي يا حبيبتي.. خليني أشتري لك واحده جديدة" بس عمره ما جاب بدالها..

بالغلط استخدم الكريم بتاع وشي اللي العبوة منه بـ 60 دولار على إنها كريم للكعب.. وقالي "أصل العبوات متشابهه".. مع إنهم مالهمش أي علاقة ببعض.. الكريم بتاعي كان عبوته إزاز لونها بمبي.. والكريم بتاع الكعب أنبوب أزرق..

ف تالت شهر لنا سوا.. الحوادث بقت تتكرر بشكل يومي.. الماسكرا بتاعتي وقعت ف التواليت وهو بينضف.. الروج بتاعي ساح ف المجفف.. وقالي يومها "اكيد وقع من جيب حاجة من هدومك"

المكواه اللي بتعمل شعري كيرلي.. سلكها اتقطع بشكل غامض.. ولما سألته قال "تلاقيها اتقطعت وانا بفتح الدرج"..

كل يوم الصبح حاجة كانت بتبوظ.. بقيت أخبي حاجتي بس هو برده كان بيلاقيها.. أحطهم ف درج وأقفل عليهم.. يكسر القفل ويقولي "كنت بصلح السراحة"..

أخبيهم ف عربيتي.. ياخد المفاتيح من ورايا وبشكل من الأشكال يطلع الحاجة ويسيبها بره ف جو يناير المتلج... حتى العبوات المقفولة كانت بتنفجر بدون سبب..

الهدوم كان وضعها أسوء.. بقع كلور على كل الفساتين الغامقة وعلى كلامه "حوادث ف الغسيل".. قطعات في البلوزات بتاعتي من الغسالة.. وسبحان الله الغسالة مش بتدمر إلا حاجتي أنا بس..

حتى

الجزمة الكعب بتاعتي اتكسرت لما داس عليهم بالغلط وهو مش واخد باله.. 12 جزمة على مدار 6 شهور يتكسروا بطرق مختلفه..

أكتر جاكت بحبه اتقطع.. لما اتنتش بسبب العجله بتاعته وهو بيركنها في الجراج.. ازاي جاكت متعلق فوق يتقطع بسبب سير عجله!! ماكنش عنده تفسير.. كل اللي قاله "اسف.. انا بجد مش بركز"..

وطبعًا لو جاب بدايل.. كان بيجيب حاجات بشعه.. من المحلات الرخيصة اللي هو عارف إني استحاله البسها..

كل مرة بيكون عندي حاجة مهمه.. حاجة بتدمر.. في مقابلة شغل.. البدلة الوحيدة اللي عندي اتغرقت حبر بسبب قلم انفجر ف الدولاب.. ف فرح صحبتي المقربة.. فستاني اتقطع بسبب القطة..

ف اجتماع مهم جدًا ف شغلي شنطة اللاب توب بكل الورق اللي كان فيها اتنقعوا ف الماية لأنه سابها بره ف الشتا وهو بيساعدني مع العربية.. انا عمري ما طلبت منه يلمس حاجة الشغل بتاعي..

بدأت أوثق كل حاجة.. اخد صور.. نايثن قالي "انتي شكاكه.. أنا بس محتاج اركز مش أكتر.. طب أقولك بطلي تشتري حاجات غاليه لو انتي قلقانه كده إنها تبوظ"

وسبحان الله برده.. حاجته عمرها ما حصلها حاجة.. مجموعة البرفانات بتاعته زي ما هي.. ساعاته ف حالة مثالية.. مفيش إلا حاجتي إلي بتعاني من قلة تركيزه وإهماله...

أصحابي أخدوا بالهم.. كان باين عليا الإرهاق طول الوقت.. والإحباط ودبلانه على طول.. بطلت احط مكياج.. عشان ايه اللي يخليني اتعب نفسي واشتري حاجة انا عارفه إنها هتتكسر أو تبوظ.. مش بلبس إلا 3 أطقم بس.. لأنهم هما اللي نجوا من نايثن..

ف نفس الوقت نايثن بقى يعلق أد ايه أنا بقيت سايبه  نفسي.. ومبقتش

أحاول احسن أي حاجة فيا.. وبقيت ست مهمله ف شكلي..

وبعدين يقترح عليا إني أحاول ألبس أحسن.. أحاول أكتر.. ف نفس الوقت اللي أي حاجة بجيبها عشان أحسن مظهري بيدمرها..

الحقيقة عرفتها بسبب بنت عمي جانيت.. هي كانت شاكه فيه وعرضت عليا تركب لي كاميرات مراقبة.. كانت مديونه ليا بخدمه وهتعمل كل حاجه مجانا.. وفعلا حطت كاميرات صغيرة جدًا في أوضة نومي وفي الحمام من غير ما نقول لـ نايثن.. كانت الخطة إني احطهم أسبوع واحد بس.. عشان نشوف اللي بيحصل..

اللي شوفته خلاني ارجع.. نايثن كان عامد متعمد بيخرب أي حاجة بتاعتي.. بيخرم فساتيني بالمقص وهو بيتكلم مع أخوه ع التليفون.. بيقول وهو بيضحك "هي خلاص بقت أبشع من إنها تفكر تسيبني"..

شوفته بيكب مايه ف شنطة المكياج بتاعتي.. وبيقول "الستات المتجوزه اللي بيهتموا بنفسهم دول شمال"..

شوفته وهو بياخد صور لحاجتي اللي خربها وبيبعتها لمجموعة محادثة اسمها "خليها تحت رجلك" كان فيها أصحابه.. بيدوا لبعض نصايح ازاي يتلاعبوا نفسيًا بستاتهم..

أسوء موقف حصل كان البدلة اللي هحضر بيها الانترفيو ف الوظيفة اللي كنت بحلم بيها.. شركتي أعلنت عن وظيفه فاضية ف منصب مدير.. بضعف المرتب.. اشتريت بدله جديدة بفلوسي وكنت مخبياها ف بيت جانيت..

يوم المقابلة الصبح جبتها البيت.. يا دوب دخلت استحمى.. وطلعت لقيت نايثن ماسك البدلة بيقطعها حتت بمقص المطبخ.. وهو فاتح الاسبيكر بيكلم أمه.. ماكنش يعرف إني رجعت البيت.. بيقول "مش هتاخد الوظيفة دي.. هي أصلا مبقتش واثقة ف نفسها إنها تتكلم كويس.. ودلوقتي هتروح وشكلها شبها المشردين.. كام

شهر كمان وهتبطل تحاول تمامًا"

أمه كانت بتضحك وبتنصحه ازاي يخليني احس إني عديمة القيمة أكتر.. صورت كل حاجة بتليفوني من باب الحمام الموارب.. وشوفته وهو بيرجع البدلة مكانها ف الغلاف وبعدها ف الدولاب وطلع على شغله..

لبست هدوم قديمة للمقابلة دي.. واخدت الوظيفة برده.. والأسبوع اللي بعدها لما كان نايثن ف شغله نقلت كل حاجة امتلكها وكام حاجة من حاجته كتسوية على الخساير اللي سببهالي..

ومنستش أدوقه من نفس الكاس.. كل البرفانات اتكسرت ف الحوض.. كل الساعات اتكسرت بالشاكوش.. الهدوم الأصلية بتاعة فريق الكرة اللي بيشجعه نقعتها ف الكلور..

وقبل ما امشي شغلت له فيديوهات كاميرات المراقبة على التلفزيون بإعادة مستمرة مع ورق الطلاق على الترابيزة..

نايثن رجع البيت عشان يشوف الدمار اللي حصل والدليل على الإساءات اللي كان بيعملها.. اتصل بيا وهو بيصرخ عشان حاجته.. ف قولت له "ماخدتش بالي.. ماكنتش مركزه.. بالغلط.. متبقاش تجيب حاجات غالية"

حاول يرفع عليا قضية بس المحامي بتاعه لما شاف التسجيلات بتاعتي قاله "خد أي عرض تديهولك وانت ساكت"..

ف تسوية الطلاق خسر البيت.. دفع نفقه.. وأصحابه بقى اللي كانوا على جروب "خليها تحت رجلك" اتطلقوا كلهم بعد ما بعتت لمراتاتهم سكرينات كنت أخدتها من الجروب..

حاليًا نايثن عايش ف شقة استديو.. والأسبوع اللي فات كتب بوست بيتكلم فيه عن ازاي الستات بقوا ماديين أوي..

التعليقات نزلت على دماغه زي المطر.. الكل بيهزقه خصوصًا بعد ما طليقة واحد من أصحابه حطت سكرينات باللي كان ف الجروب.. ف مسح كل حساباته ع النت..

وأنا دلوقتي

بلبس اللي أنا عايزاه ومش خايفه أشتري حاجات غاليه.. تمت 

#Dodo✌️