انا وخطيبي .
أنا وخطيبي "جايكوب" مع بعض بقالنا 6 سنين.. عيلته عزمتنا عشان نحتفل بخطوبتنا.. كل حاجة كانت طبيعية لحد ما اخته "صوفيا" وقفت وخبطت على الكاس بتاعها وكأنها على وشك تعلن عن حاجة خطيرة..
صوفيا اتحركت ودخلت أوضة في أخر البيت.. وبعدين طلعت بكيس فستان عملاق.. الكل كانوا متحمسين.. وأنا كنت قاعده مش فاهمه أي حاجة!!
صوفيا فتحت الكيس وطلعت فستان فرحها اللي كان من سنتين.. ساعتها كل اللي قاعدين كانوا بيصقفوا.. ويهيصوا والا كأنها لقت علاج للسرطان..
صوفيا قالت "دي هديتي ليكم بمناسبة الفرح.. أنا عايزاكي تلبسي فستاني في فرحك"
حسيت معدتي قلبت.. عشان أنا كنت هلبس فستان مامتي.. لأن الفستان ده بنسلمه لبعض ف العيلة من أجيال.. وأنا كنت بحلم البسه من وقت ما كان عندي تقريبًا 7 سنين.. بجربة من وقت للتاني في السر لما ماما تبقى مش موجوده ف البيت..
الفستان ده بالنسبالي ماكنش مجرد قماش.. كان كل حاجة بالنسبالي..
حاولت ابتسم وابقى مؤدبة.. بس من الواضح إن وشي فضحني عشان الكل بقوا يسألوني "في ايه؟ مالك؟"
ف شرحت ازاي أنا من صغري بحلم وبخطط إني ألبس
ساعتها الدنيا اتقلبت حرب.. صوفيا فورًا قلبت وشها عليا.. أبو وأم جايكوب هجموا عليا وهما بيسألوني أزاي ابقى ناكره للجميل وأنانيه بالطريقة دي!
امه قالت "انتي كده هتكسري تقاليد العيلة".. وبصراحة مش عارفه أي تقاليد دي.. هما ألفوا التقاليد دي واحنا قاعدين بناكل!! حسيت بضغط رهيب من الكل لدرجة إني عيطت وجريت بره البيت..
فضلت قاعده أعيط قدام البيت لمدة حسيت إنها ساعات.. متوقعة إن جايكوب يجي يهديني.. بس لما طلع أخيرًا كان متعصب جدًا.. وفورًا بدأ يزعق لي عشان أركب العربية..
وطول السكة للبيت كان بيصرخ فيا وبيقولي أد ايه أنا احرجته قدام عيلته.. بعدها شتمني شتيمة قذرة..
وقالي"صوفيا كانت بس بتحاول تبقى لطيفة وبعدين فستانها أحدث بكتير من الخرقه القديمة بتاعة أمك اللي بتقولي عليها فستان"
حاولت أشرح له أد ايه فستان ماما له معنى كبير عندي.. وازاي وعدتها إني هلبسه.. بس هو مسمعش وفضل مكمل كلام..
عارفين إيه أسوء جزء؟ إني أدركت إن كل حاجة حصلت كانت متخطط
بس أستنوا.. شوفوا بقى العك الحقيقي.. بعد أسبوع كنت بكلم صاحبتي "كايسي" واللي بتشتغل في محل فساتين أفراح ف وسط البلد.. حكيت لها كل اللي حصل وساعتها بقى على وشها نظرة غريبة أوي..
وقالت "استني.. هو الفستان ده شكله ايه؟؟"
وصفتهولها.. فستان مودرن.. بدون أكمام.. وفي كمية تطريز كبيرة جدًا.. كيسي ساعتها طلعت تليفونها من شنطتها وبدأت تدور ف الصور.. وفجأة قالت "يا نهار أسود" وهي بتوريني التليفون وبتسألني "الفستان ده؟"
قولتلها "هو بعينه"
اتضح إن صوفيا ماكنتش شارياه أصلًا.. هي كانت مأجراه عشان فرحها.. كايسي افتكرت لأن صوفيا راحت لها تاني يوم فرحها ورجعته وساعتها دفعوها من فلوس التأمين عشان الفستان كان فيه بقع..
ف صوفيا كانت بتحاول تهاديني بفستان متأجر بالفعل استخدمته ورجعته من سنتين.. أكيد أجرته مخصوص عشان تنفذ العرض اللي حصل قدام العيلة
ف نفس الليلة وريت جايكوب الصور.. وبدل ما يتعصب من أخته إنها كدبت.. لا هو اتعصب مني عشان دورت ورا الموضوع وبحاول أخلي شكل صوفيا وحش..
قالي "حتى لو الكلام اللي بتقوليه ده صح.. وهي مأجراه.. برده كتر خيرها"
ساعتها عرفت إني مش هقدر اتجوز الراجل ده.. واحد بيقول على ميراث عيلتي خرقة قديمة.. بيدافع عن التلاعب بتاع اخته.. ده أكيد شخص أنا مش هقدر أكمل حياتي معاه..
تاني يوم الصبح فركشت الخطوبة.. عيلة جايكوب كانوا هيتجننوا على السوشال ميديا.. وعمالين ينشروا عن أد ايه أنا ناكرة جميل وكسرت قلب ابنهم عشان فستان غبي.. بس أصحابي وقرايبي كانوا واقفين جنبي..
بعد 6 شهور اكتشفت إن صوفيا عملت نفس الحوار بالظبط مع الإكس بتاعة أخوها التاني.. من الواضح إن هي كانت بتستمتع باللعبة دي وبتحاول تشوف إذا كانت هتعرف تجبر مراتات أخواتها إنهم يلبسوا "فستانها" عشان تأسس لقاعدة مهمة وهي إنها هي المسيطرة..
أنا فعلًا لبست فستان ماما.. لما روحت فرح بنت عمي وكنت وصيفة ليها.. كان شكله مثالي.. بالظبط
احاديث_تيكتوكيه
#LamiaaShaheen
