الصمت
أنا وجوزي جريج متجوزين من 14 سنه.. كان عنده تصرف واحد بس بيعمله لما أي حاجة بتحصل مش عاجباه.. الصمت.. مش النوع اللي هو إن شخص محتاج مساحة عشان يهدا.. لا الصمت اللي بيتعمل عشان يحسس الشخص اللي بيتعاقب إنه مش موجود أصلًا..
أول مرة مارس عليا الأسلوب ده.. كانت بعد 6 شهور من جوازنا.. اشتريت كنبة لأوضة المعيشة من غير ما أقوله..
فضل 4 أيام مش بيكلمني.. مع العلم إني رجعت الكنبة تاني يوم الصبح.. واعتذرت لحد ما ريقي نشف.. ومن ساعتها ده بقى النمط..
لو زرت أختي من غير ما أقوله الأول.. يقعد يومين في صمت.. لو اختلفت معاه في أي حاجة بخصوص الماديات وطريقة صرفها.. يقعد 5 أيام صمت..
لو قولت له إنه غلطان في أي حاجة تمامًا يفضل ساكت لدرجة إني أنسى إنه عايش معايا في البيت من أساسه.. وكل مرة كنت باجي على نفسي.. بطبخ له الأكل اللي بيحبه وأسيبهوله على ترابيزة المطبخ والا كأنه قربان..
أبعت له فقرات كاملة اعتذر له ويقراها وعمره ما يرد عليا.. اقعد على طرف السرير بالليل اهمس بالاعتذار لراجل أنا عارفه إنه بيمثل إنه نايم..
وبعد شوية يرجع تاني يكلمني لما يحس إني عانيت بما فيه الكفاية.. والمطلوب وقتها إني أكون ممتنة.. ممتنه إن جوزي رجع يكلمني تاني..
دي كانت حياتنا لمدة 14 سنة.. بس من 3 أسابيع لما قولت له إني عايزه أرجع ادرس تاني.. كان بقالي فترة
فضل باصص للاب توب قدامه وبعدين قالي ده كلام مش واقعي
قولت له بس أنا متأكدة من كل حاجة.. انا كلمت مسؤول القبول
ساعتها قفل اللاب توب وقال احنا مش هنصرف فلوسنا على الهبل ده
قولت له بس ده نص المصاريف ممولة والباقي هاخد قرض تعليمي صغير
قالي أنا قولت لا
قولت له الموضوع ده مهم بالنسبالي
سابني وطلع من الأوضة.. ومن وقتها البيت رجع تاني غرقان في الهدوء والصمت..
أول يوم.. عيطت لوحدي في الحمام..
تاني يوم.. كنت على وشك أخد عربيتي واروح السوبر ماركت اشتري مكونات اللازانيا اللي بيحبها عشان أعملهاله.. اخدت المفاتيح وطلعت وقفت قدام الباب..
ولأول مرة ف 14 سنة.. سألت نفسي هو أنا ايه اللي يخليني أقف اطبخ أربع ساعات لراجل هو أصلًا مش عايز يبص ف وشي بس عشان طلبت إني أرجع ادرس تاني؟..
دخلت ورجعت المفاتيح مكانها وقعدت على ترابيزة المطبخ.. وفتحت اللاب توب اللي هو قفله..
تالت يوم.. دخل أوضة المعيشة من غير ما يبص ناحيتي.. كنت بملى استمارة التقديم.. مبصتش ناحيته أنا كمان..
رابع يوم.. اتصلت باختي اللي بقالي شهور مكلمتهاش... سألتني صوت متغير ليه؟.. قولت لها مش عارفه
خامس يوم.. سلمت استمارات التقديم.. ايدي كانت بتترعش.. بس بعتها.
سادس يوم.. بدأت أرجع أمشي الصبح.. 2 ميل وبعدين 3 ميل.. بقيت ارجع البيت في لون في وشي.. وطاقه محستش بيها من سنين.. جريج أخد باله وبان عليه الحيرة..
سابع يوم.. غيرت النظام في أوضة المعيشة.. حركت كرسيه من نص الأوضة.. وحطيت الكرسي بتاعي اللي بقرا عليه جنب الشباك عشان النور أحسن..
لما نزل بص ع الأوضة وبان إن النظام معجبهوش.. بس والا فرق معايا.. أنا أصلًا ساعتها كنت قاعدة بقرا جنب الشباك..
تامن يوم.. مطبختلهوش.. عملت أكل لنفسي ولعيالي.. وحطيت لنا احنا بس الأكل.. نزل من الأوضة ووقف قدام التلاجة وفتحها.. وفضل باصص فيها فترة قبل ما يقفلها ويطلع تاني..
تاسع يوم.. طلعت ألبومات الصور القديمة اللي من قبل جوازي.. شوفت فيها واحده معرفتهاش.. واحدة بتضحك.. وحاسه بالحرية بجد.. وقررت إني عايزة أقابلها من جديد..
عاشر يوم.. في حاجة جوايا اتغيرت.. اكتشفت إن الصمت مبقاش عقاب بالنسبالي.. المرة دي كنت شايفه الصمت أول مساحة صادقة أخدها مع نفسي خلال 14 سنة جواز..
محدش بيراقب كلامي.. محدش بيأدبني عشان رأيي.. محدش بيقرر هل استحق إنه يرد عليا والا لا.. أنا قادرة اتنفس بحرية..
اليوم ال.. قررت أبيض أوضة النوم لون أنا بحبه من غير ما أقوله.. وبعدها اشتركت للولاد في تمرين سباحة كان نفسي اشترك لهم فيها من شهور.. شربت القهوة مع جارتي اللي كنت خايفه
ف الوقت ده جريج كان هيتجنن.. بقى يحوم حوالين المكان اللي أنا قاعده فيه.. يراقبني.. يقعد قدامي وكأنه مستني إني أروح اعتذر وأصالحه زي كل مرة...
اليوم ال.. جالي جواب القبول.. اتقبلت.. قعدت في عربيتي قدام البيت وعيطت.. انهارت من العياط.. مش عشان أنا حزينة.. عشان أدركت إني كنت على وشك مقدمش بسبب راجل مش بيكلمني أصلًا قالي لا..
اليوم ال.. أخيرًا جريج أتكلم.. دخل المطبخ وقال هي هتمشي كده على طول؟
بصيت له وقولت له انت مش بتكلمني من 18 يوم.. أنا اتقبلت في مدرسة التمريض.. فتحت حساب بنكي بأسمي.. بيضت أوضة النوم.. وعملت قرارات في 18 يوم أكتر من اللي عملتها في 14 سنه جواز.. ف أه هي هتمشي كده على طول
وشه ابيض من الصدمة.. وأنا كملت كلام كل مرة أعمل حاجة متعجبكش بتمسحني تمامًا من حياتك.. بتخليني أحس إن محتاجة إذن عشان بس أبقى موجوده.. وأنا قضيت 14 سنة مصدقة ده.. دلوقتي انت قدامك اختيارين.. يا تكون جزء من الأسرة دي كشريك.. أو تفضل زي ما انت كده تقف تراقبني من ممرات الأوض.. وتستنى ست مبقتش موجوده خلاص
التلات اللي فات بدأت أول يوم في مدرسة التمريض.. قعدت ف أول محاضرة ف أول صف.. وفتحت كراسة.. وساعتها أدركت إن الست اللي قاعده دي وماسكه قلم وهتكتب.. ست جوزي مقابلهاش خلال 14 سنة جواز.
احاديث_تيكتوكيه
LamiaaShaheen
