انا اسفة
أنا أسفه إني تخينه.. أصلي خلفت بنتين.. الأولى كان وزنها عند الولاده 4 كيلو ف 2018 والتانية لما اتولدت كانت 4 كيلو ونص ف 2020.. وقتها كان الحظر وكنت بشتغل بدوام كامل من البيت وبرده كان لازم أستمر في مهامي كأم..
بس أنا بقالي كام شهر بتمرن.. وهدومي ما صدقت بدأت توسع عليا شويه.. ف قررت أكافئ نفسي واروح أشتري لنفسي حاجات جديدة مظبوطه عليا..
كنت ف محل هدوم ببص على فساتين صيفي لما سمعت واحد من ورايا بيتكلم وبيقول بصوت عالي بجد "ايه اللي يخلي الناس تبص على هدوم زي دي وهما واضح أوي إن جسمهم مش مناسب لها"
بصيت ورايا.. لقيته باصص لي مباشرة.. أنا الوحيدة اللي كنت ف القسم ده ف المحل غيره هو ومراته.. الراجل ده حرفيًا تخين لدرجة إنه ماكنش قادر يتكلم.. كرشه كان مدلدل من التيشيرت بتاعه حوالي 4 إنش قدامه.. كان شكله كأنه لسه بالع كرة شاطئ..
لفيت له وابتسمت اكتر ابتسامة حلوه عندي وقولت له "انا طلعت من بطني طفلين كبار ما شاء الله.. أنت بقى بطنك دي فيها ايه؟؟"
مراته انهارت من الضحك.. كانت بتضحك جامد جدًا لدرجة إنها سندت على ستاند الهدوم اللي جنبها..
أما الراجل ف وشه بقى لونه موف.. ومشي من قدامي من غير ما يقول والا كلمة..
المحل اللي بعده.
لما واحدة جت وهي باين عليها الحماس وقالت "الله.. ألف مبروك على البيبي.. هتولدي امتى؟؟"
حسيت معدتي قفشت.. أنا عارفه إن أحيانًا شكلي بيبان إني لسه حامل.. بسبب الزاوية أو اللبس اللي أنا لابساه.. بس إني أسمع حد بيقول كده بصوت عالي.. كان صعب عليا.. لثواني وقفت مكاني.. وبعدها بصيت للست ف عينيها مباشرة وقولت لها "شكرًا.. ولدتها ف 2020"
فورًا ابتسامة الست راحت من على وشها وكأن حد ضغط على زرار فصلها.. برطمت بحاجة مسمعتهاش ومشيت من قدامي بسرعة لدرجة إنها اتكعبلت..
رجعت لأوضة القياس وقلعت الفستان ومشترتهوش..
الأسبوع اللي بعده كنت ف الجيم.. على التريد ميل.. لما سمعت 2 ستات ع المشايات الي جنبي بيتكلموا.. واحده منهم فضلت تبص لي وتقول لصاحبتها "في ناس المفروض ميلبسوش هدوم للجيم ضيقة بالمنظر ده".. صاحبتها ضحكت أوي على كلامها..
أنا كنت حاطه السماعة ف ودني.. بس الموسيقى كانت هادية بين الأغاني وعشان كده سمعت كل كلامهم..
كملت جري
هما الاتنين سكتوا.. واحده منهم نزلت من ع المشاية وبعدت عني.. والتانية قالت بتردد "انا كنت بهزر"
قولت لها "الهزار المفروض يبقى دمه خفيف".. وبعدها سيبتها ورجعت للمشايه بتاعتي وخلصت الجري بتاعي...
ف نفس الشهر كنت ف السوبر ماركت.. مع بنتي ف العربية بتاعة التسوق.. كنت ف قسم المجمدات بجيب خضار لما واحدة ست كبيرة وقفت عربيتها جنب عربيتي.. وبعدها بصت لبنتي ورجعت بصت لي وبعدين لبنتي تاني.. وقالت "تعرفي.. انتي لو خسيتي شوية هتحسي إنك احسن بكتير.. انا بس بحاول أساعدك"
فضلت باصه لها كام ثانية.. وبعدين قولت لها "تعرفي.. لو خليتيكي ف حالك الناس ممكن فعلًا يحبوكي.. انا بس بحاول أساعدك"
بقها اتفتح من الصدمة.. وأنا سحبت الخضار اللي عايزاه ومشيت.. بنتي بعد ما مشينا سألتني "هي الست دي كان شكلها زعلان ليه؟"
قولت لها "عشان في ناس مش بتعرف تبقى لطيفة"
وصلت البيت ووقفت قدام مراية حمامي.. بصيت لمعدتي.. العلامات
وبعدين فكرت ف ولادي الاتنين اللي نايمين في أوضهم.. فكرت ازاي جسمي كونهم.. حافظ عليهم.. غذاهم.. وخلاهم عايشين بصحة دلوقتي..
مسكت تليفوني وبعت لأختي رسالة قولت لها فيها إني متضايقه من كل التعليقات اللي الناس بتقولها على جسمي..
بعتت فورًا تسألني "طب انتي بتردي عليهم؟؟"
كتبت لها كل المواقف اللي حصلت خلال الأسابيع اللي فاتت.. وكل ردودي على كل واحد فيهم..
بعتت لي رسالة فيها يجي 15 إيموجي ضحك.. وبعدين كتبت لي "انتي من النهارده قدوتي"..🤭🤭🤭
من يومين كنت ف سوبر ماركت تارجت.. وشوفت مييييين؟؟ نفس الراجل اللي شوفته ف محل الهدوم.. أبو كرش.. كان معاه مراته..
أول ما شافني لف وشه فورًا ومشي في ممر مختلف.. مراته كمان شافتني وعملت لي باي باي وهي بتبتسم.. وأنا كمان عملت لها باي باي..
ساعتها أدركت حاجة مهمة أوي.. الناس دول.. اللي بيعلقوا.. هما اللي دايمًا بيكونوا محرجين بعد ما أرد على تعليقاتهم على جسمي.. هما اللي بيمشوا من قدامي.. هما اللي بيخرسوا مش أنا.. يومها اشتريت بنطلونين جينز.. واحد
