قصة المشتبه كتابة حماده هيكل

أعتقد أن السعر دا لقطة يا أستاذ ومش هتلاقي زيه 
في اي معرض تاني
ايوه بس انا محتاج أفكر شوية
خطيبتي داست على رجلي وقالت
لا تفكر ايه بس يا طارق العربية لقطه
وسعرها ممتاز
قربت منها وأنا بقول بصوت واطي
ماهو انا اللي هدفع هو انتي خسرانه ايه
يا حبيبي ماهو كله لينا في الاخر
لينا !! اه طيب
ها يا أستاذ طارق نقول مبروك
الله يبارك فيك
دا شيك بسعر العربية تقدر حضرتك تصرفه من بكره
ولو اننا مش بنقبل الا كاش
لكن طالما حضرتك جاي من طرف عمر باشا 
يبقى احنا عنينا ليك
واحنا في الطريق وسايق العربية الجديده
فاطمه بصت لي وقالت
ها شوفت بقى أن الراجل كارمنا عشان خاطر عمر
يادي سي عمر اللي مصدعانا بيه
وبعدين يا ستي هو كارمنا فين
دا انت جاحد يا اخي ..نزل 5 الاف جنيه من سعرها 
وتقول كارمنا فين ..وبعدين ماله عمر ها
عمر عمر ..احنا مفيش ورانا غير سيرته ولا ايه
انت غيران منه بقى
يا سلام وهغير منه ليه
يعني عشان ظابط وليه معارفه 
ظابط على نفسه وطالما هو عاجبك اوي كدا 
وافقتي عليا ليه ..ماهو بيحبك وانتي رفضتيه
طارق ..انت كدا زودتها بجد ..انت عارف انه زي اخويا 
احنا متربيين سوا ومتنساش انك عرفتني عن طريقه
ولو سمحت وقف هنا
أوقف فين !
انا نازله هنا
انتي اتجننتي ..احنا مش متفقين اننا هنحتفل بالعربية الجديده
لا هتحتفل ولا نيلة ونزلني هنا بقى لو سمحت
لا مش هنزلك
كدا طيب
بتفتح باب العربية
بتعملي ايه يا مجنونه
لو موقفتش هرمي نفسك
طيب خلاص خلاص
وقفت ونزلتها
اهو نزلتك ارتحتي
يلا

بقى امشي
امشي يعني !
ايوه امشي
مش هينفع اسيبك في حته مقطوعه زي دي لوحدك
لا متقلقش عليا انا هتصرف ..امشي بقى
طيب على راحتك يا فاطمه ..سلام
سيبتها ومشيت
فضلت مراقبها من مراية العربية وشايفها وهي بتختفي 
عن الطريق بالتدريج
فضلت واقفه بعدها ومستنية اي تاكسي يعدي
اكتر من ربع ساعه ومفيش تاكسي وقف لها
حست بالندم وكانت عاوزه تتصل عليا بس غرورها منعها
وبعد دقايق وقفت لها عربية ملاكي 
نزل منها 2 شباب ..
ايه اللي موقفك هنا لوحدك يا قمر
واضح انها مستنيه حد
ماتيجي نوصلك لاي حته وتاخدي اللي انتي عايزاه
انت انسان قليل الادب
وليه كدا .الحق عليا اني عاوز اوصلك
وانا مطلبتش منك توصلني واتفضل سيبني في حالي 
وغور من وشي انا مش ناقصاك
اغور كمان ..تصدقي انك بنت مش محترمه
انا مش محترمه يا ابن ال...
وبعدها هجموا عليها الاتنين وحاولوا يحطوها 
جوه العربية بالقوة
وهي فضلت تذق فيهم وتضرب وتدافع عن نفسها 
بكل قوتها ..لغاية ما رجعت انا بسرعه
ونزلت من عربيتي وخلصتها من ايديهم
انت ايه رجعك 
وانتي فاكرة أني كنت هسيبك لوحدك يا مجنونه
الطريق كان ضلمه ومفيش فيه الا نور العربية
ملامحهم مكنتش واضحه
بعدها الشابين مسكوا فيا ..ضربت واحد منهم برجلي 
وقع على الأرض والتاني كتفني من ورا
قام الاول من الأرض وطلع مطواه وفتحها
فلت نفسي من التاني بسرعه وذقيته على صاحبه 
المكواه انغرست جوه قلبه ..وقع ع الأرض 
والدم نزف منه بغزارة
صاحبه بص لي وبص لصاحبه اللي غرقان في دمه
وخد عربيته وجري ..
خدت فاطمه من إيدها بسرعه وهي بتصرخ 
وركبنا العربية وجرينا
عاجبك يعني اللي عملتيه دا 
انا اسفه يا حبيبي
اسفه ايه بس وزفت ايه ..كويس لو كان حصلك حاجه
يعني ..والمصيبة اللي حصلت دي تفتكري رجلنا 
مش هتيجي فيها 
لا بأذن الله مش هيحصل حاجه 
وكمان انت مقتلتوش صاحبه اللي قتله
وانت كنت بتدافع عننا
ربنا يستر وصاحبه ميكونش شافني 
يارب يارب ..انا اسفه بجد سامحني
بعد ساعه كنا وصلنا الكافيه وطلبنا قهوه وعصير 
كنت قاعد على أعصابي ومتوتر
وبعدها مامتها أتصلت وقالت انها عزمانا ع العشا
عشا ايه بس مش شايفه اللي احنا فيه
لا لازم تيجي وتبان انك طبيعي ..ومفيش حاجه
حصلت ..محدش هيعرف اللي حصل الليلة دي غيرنا
ولو مروحتش ماما هتفضل
تقول
ماله ومجاش ليه
وانت عارف بقى حماتك
طيب امري لله
بعد ساعتين كنا في بيت أهلها وقاعدين ع السفرة
وبنتعشى ..التوتر ابتدا يروح شوية
لغاية ما وصل عمر الظابط ابن خالتها
ايه أخرك كدا يا عمر
معلش يا خالتي ..حادثه على الطريق 
شاب لقيناه مقتول ..مطواه رشقت في قلبه
سيبت المعلقه من إيدي 
وفضلت أكح
فاطمه ناولتني مايه وقالت
الف سلامه ..عليك يا طارق ..اشرب
عمر بص لي وقال
مبروك العربية الجديده
الله يبارك فيك ..متشكر ع الواجب اللي عملتوا معانا
واجب ايه يا راجل دي حاجة بسيطه
بجد متشكرة اوي ياعمر
حمايا سأله
وعرفتوا القاتل
لسه بس صاحبه اتمسك في كمين ..وكان في دم
على هدومه واعترف انه صاحبه اتقتل على ايد واحد مجهول بعد ما أشتبكوا معاه بعد ما اتعرض لبنت كانت ع الطريق واقفه لوحدها وهو بيحاول يخطفها
وصاحبه دا هرب من مكان الحادثه لأنه خاف يتورط في الجريمه
حمايا رد
غريبة اوي الحكاية دي طب ومعرفش مين هو الشخص دا
لسه جاري البحث عنه وهنعرفه ..المشتبه فيه معرفش
شكله لان الطريق كان ضلمه وكمان ملقناش سلاح الجريمة
بص لي وكمل
على فكرة يا طارق هو نفس الطريق اللي كنتوا راجعين عليها 
وانتوا راجعين من المعرض ب كيلو
بجد بس احنا مشوفناش اي حاجه غريبة ع الطريق
وكمان ايه اللي هيوقف وحده لوحدها في طريق زي دا
ولا ايه يا فاطمه
ها ..اه فعلا مكنش في حاجه لفتت انتباهنا واحنا راجعين
جايز تكون الحادثه حصلت بعد مروركم من هناك
بلعت ريقي بصعوبه وحاولت ابان طبيعي 
لكن وانا باكل فاطمه لمحت أثار دم على ياقة القميص
واضح انه من ساعة الحادثه وانا مخدتش بالي منه
قربت من ودني ونبهتني 
مسحت ايدي بسرعه 
ومسكت ياقة القميص ورفعتها وانا بقول
سفرة دايمه يا حماتي ..تسلم ايدك
ايه يابني هو انت لسه اكلت
واضح أن فرحته بالعربية الجديده شبعته
الكل ضحك وانا تظاهرت اني ضحكت 
وانا بقول
اه باين كدا فعلا ..
مع خطيبك يا فاطمه عشان يغسل إيده
وقفت فاطمه جنبي وهي بتحاول تشيل أثر الدم
من ياقة القميص
وبعد دقيقتين
عمر كان واقف ورايا وقال
أحم أحم
فاطمه سابتنا ومشيت
واحنا بنشىرب الشاي
عمى قرب مني وقال
على فكرة انا عرفت اللي حصل
عرفت !! عرفت ايه
واضح أن كان في أثر روج على ياقة القميص
وفاطمه كانت بتحاول تمسحه قبل ما حد ياخد باله
بلعت ريقي وانا بقول
بس ياعم وطي صوتك انت هتفضحنا
اهدى يابني ..ايه مش قادرين تصبروا لحد ما بيت يلمكم
معلش ..طيش شباب بقى
تمت
المشتبه
حماده هيكل