ابني ايلي
ابني إيلي عنده 7 أسابيع.. أنا ف أجازة الوضع من قبل الولاده بأسبوع.. ف تقريبًا بقالي 8 أسابيع ف البيت.. جوزي ديريك رجع شغله بعد ما الأسبوعين رعاية المولود اللي أخدهم خلصوا.. ومن ساعتها مفيش إلا أنا اللي ف البيت مع إيلي طول اليوم..
قدرت أرتب نفسي واظبط أموري.. بس اللي ماكنتش عامله حسابه اللي حصل من 3 أيام.. هي حماتي ساندرا وأفكارها الغريبة عن الفلوس اللي بقبضها أثناء أجازة الوضع..
بعد أسبوعين من ولادة إيلي.. ساندرا اتصلت وقالت أنا عايزه اسافر وأجي لكم أساعد معاكم
قولت لها احنا تمام.. بس أهلًا بيكي طبعًا لو عايزه تيجي تزورينا
قالت لي انا اشتريت تذكرة الطيران خلاص
رديت عليها عظيم
وأنا فعلًا من قلبي كنت قاصداها لأني تقريبًا مبنامش.. وفكرة وجود شخص بالغ معانا ف البيت تبدو وكأنها إنقاذ لحياتي..
ساندرا وصلت يوم الحد الي قبل الي فات ومعاها شنطتين كبار وشنطه بعجل.. قعدت معانا لمدة 7 أيام.. بصوا بقى عملت أيه لما كانت قاعده معانا الأسبوع ده
1. كانت بتشيل إيلي وهو هادي.. وبمجرد ما يعيط تديهولي ف ايدي عشان أرضعه..
2. بتتفرج عليا وأنا بطبخ ال وجبات وهي قاعده على كنبة الليفينج روم...
3. بتتابعني وأنا بغسل..
4. رتبت المطبخ بتاعي تاني يوم وجودها ف البيت.. بطريقة غير منطقية.
5. عملت العشا مرتين بس.. وف المرتين كانت أكلات ديريك جوزي مش بيحبهم..
6. كانت بتقول رأيها ف أوضاع الرضاعة الطبيعية بتاعتي كل مرة برضع ابني..
7. كانت طول الوقت تقول إن البيت ساقع جدًا..
8. رابع يوم وأنا برضع ابني سألتني انتي ليه منزلتيش وزن الحمل لحد دلوقتي
يوم الحد الي فات.. يوم ما مشيت كنت مرهقة جدًا مما كنت عليه قبل ما توصل.. لأني كنت باخد بالي من ابني اللي لسه مولود.. وف نفس الوقت بضايف ضيفه عندها مشاعر قوية تخص كل حاجة حواليها.. وماكنتش ملاحظة تمامًا إني أنا اللي بعمل الشغل كله..
ديريك وداها المطار بعربيته.. ورجع البيت وقالي ماما بتقول إنها قضت وقت حلو أوي.. وحست إنها بجد ساعدتنا جامد
قولت له تمام وسكت على كده..
بعد 3 أيام من وصول ساندرا بيتها.. ساندرا اتصلت بديريك وانا برضع إيلي ف الأوضة التانية.. ديريك خلص المكالمة وكان على وشه نظرة كده.. النظرة اللي بتبقى على وشه لما بيبقى بيجرب حاجه ف دماغه.. وبيحدد هو هيقولي ايه..
قعد على طرف السرير وقالي تمام.. بصي.. ماما كانت عايزاني أتكلم معاكي ف موضوع
قولت له اتفضل
قالي ماما حست إنه بما إن هي جت عشان
قولت له ايه؟ قول تاني كده؟؟ ايه؟؟ تقصدني انا؟؟
ف بسلامته كرر الكلام.. ف قولت له بص يا ابن الناس خليني واضحه كده وانا بشرح لك مرتب إجازة الوضع ده ايه.. عشان من الواضح كده إن انتوا مش فاهمين الموضوع صح.. ده بديل للمرتب بتاعي.. ده الفلوس اللي باخدها بدل مرتبي لحد ما اتعافى من الولاده وأخد بالي من ابني اللي لسه مولود.. ده مش حمام سباحة مفتوح هنعزم الناس كلها تنط فيه لمجرد إنهم زاروني وقت التعافي
ديريك سألني يعني ايه؟
قولت له يعني لا..
ديريك قالي انا كنت عارف.. بس هي طلبت مني أسألك
قولت له هو ده موضوع محتاج سؤال؟ وع العموم الإجابة لا
ديريك راح اتصل بيها تاني.. وبعد 10 دقايق تليفوني رن..
ساندرا قالت انا مش بطلب منك كتير.. انا اديتك أسبوع من حياتي.. وصرفت يجي 800 دولار ف الطيارة والمصاريف بتاعتي رايح جاي.. استخدمت اجازات من رصيدي مش هقدر ارجعها...
سيبتها تخلص كل كلامها وبعدين
ساندرا ردت وقالت أنا رتبت لك مطبخك
قولت لها ما أنا عرفت.. أنا لقيت النتيجة بتاعة المطبخ ف الحمام
قالت لي انتي ناكره للجميل.. جدات كتير غيري مش هيزعجوا نفسهم يجوا طيران لحد بيتك عشان يساعدوا مع مرات ابنهم
قولت لها شكرًا يا ستي.. جزاك الله خيرًا إنك جيتي.. ربنا يبارك فيكي.. بس مرتب إجازة الوضع بتاعي ده هو اللي هدفع منه النص اللي مطلوب مني للرهن العقاري.. لحد ما ارجع اقبض مرتبي.. مش هديكي قرش منه.
سكتت لثواني وبعدين رجعت قالت أنا دلوقتي عرفت قيمة وقتي عندك
قولت لها انتي جيتي تشوفي حفيدك يا ساندرا.. وده اللي انتي عملتيه اثناء الزيارة
ف قالت انتي هتخليني افكر إذا كنت هرجع أجي لكم بعد شهر زي ما اتفقنا والا لا
قولت لها خدي وقتك..
من ساعتها متصلتش بديريك.. وديريك من وقتها بيتعامل بحذر تام وبيختار كلماته بدقه.. بقاله 3 أيام على كده.. وعشان كده اعتقد إن في حاجات هو مخبيها عليا لسه مقالهاليش.
احاديث_تيكتوكيه
LamiaaShaheen
