اهلي قرروا يتخلوا عني
أهلي قرروا يتخلوا عني وانا لسه رضيعه.. حطوني قدام مركز مطافي ملفوفه ف بطانية ومش معايا إلا ورقة مكتوب عليها شعرها لون شعر الشيطان..
أنا الحقيقة لسه مش عارفه ده اعتقاد ديني.. والا مجرد عذر أهبل.. أيًا كان بعد ما أهلي رموني ودخلت النظام.. وأنا عندي 3 شهور بس اتبنتني أسرة طبيعية تمامًا.. بياخدوا قرارات منطقية ومفيش أي حاجة غريبة خالص..
الكون أكيد حب يعوضني عن أهلي.. لأن أبويا وأمي الجداد كانوا رائعين.. وكنت فخورة بيهم.. الحياة معاهم كانت عامله شبه الأسر المثالية في الأفلام.. ماما علمتني أرتب الورد وهي بتقولي أد أيه أنا جميلة ومميزه..
بابا كان بيدرب فريق كرة القدم بتاعي.. على الرغم من إني ف مرة جبت جون ف نفسي.. إلا إنه بعد الماتش برده سلم عليا واحتفل بيا..
أنا دلوقتي عندي 28 سنه واتجوزت السنة اللي فاتت.. ماما بنفسها اللي نظمت الفرح لأن ده كان شغلها.. واتبنيت أنا وجوزي كلب من ملجأ بيخاف من الفراشات.. الحياة كانت حلوة وماشيه كويس.. كويس أكتر من اللازم.. وكأني مستنيه حاجة تحصل تعكر كل ده عليا..
عشان كده لما وصلتني رسالة من رقم معرفهوش مكتوب فيها ازيك يا حبيبتي.. أنا أمك اللي خلفتك.. أنا عارفه إني مكلمتكيش من زمان.. بس احنا نفسنا نقرب منك تاني..
فضلت مبحلقة ف تليفوني ومش فاهمه أي حاجة.. بس بالرغم من كده كتبت لها أكيد لأني حقيقي مبقدرش أقول لا لأي حد.. حتى الناس اللي حرفيًا رموني ف الشارع..
لما وصلوا بيتي.. أول فكرة جت ف مخي كانت يا لهوي أهو اللي كنت خايفه منه حصل.. وايديا كانت بتترعش جامد لدرجة إني ماكنتش قادرة افتح الباب..
دخلوا من باب البيت وكأنهم بييجوا كل أسبوع مش كانوا رامييني عشان لون شعري معجبهمش.. وفجأة شوفت معاهم 3 من اخواتي.. عليتي كلها يا شقر يا شعرهم بني.. والا حد فيهم لون شعره أحمر..
كانوا بيحضنوني.. ويعيطوا.. وانا واقفه كأني تمثال.. كنت حاسه إني مش متحكمه ف جسمي.. قلبي بيدق جامد جدًا.. لدرجة إني حسيت إنهم سامعين صوت قلبي..
بعد كده أخويا أتكلم وقالي السر ورا الزيارة خطيبتي نفسها تقابلك.. خصوصًا إن ماما قالت لنا إن أمك اللي اتبنتك بتنظم أفراح ومشهورة أوي.. واحنا كان نفسنا يعني.. العيلة بتساعد بعضها صح؟
ساعتها لقيت نفسي بهز راسي بالموافقة.. ماكنتش عارفه بهز راسي ليه.. وطبعًا فضلوا يتكلموا عن حاجتهم لمساعدة مادية.. وازاي امي بالتبني ممكن تنظم لهم الفرح مجانا كجميل للعيلة
ساعتها سمعت نفسي بقول هفكر ف الموضوع ف نفس الوقت اللي عقلي بيصوت فيا انتي بتهزري
اخدت نفس عميق وقولت بصوت بحاول اخليه متماسك انا هدفع تكاليف الفرح.. وهطلب من ماما تنظمه بس الأول انتوا محتاجين تجاوبوا على سؤال واحد.. ايه اللي خلاكم تسيبوني وتتخلوا عني؟
الأوضة فجأة سكتت.. وأمي البيولوجية بدأت تعيط.. أما أبويا البيولوجي كان بيتنحنح وكأنه على وشك يقول حاجة.. وأنا كنت ماسكه المج بتاعي جامد لدرجة إني حسيت إنه هيتكسر..
وأخيرًا أبويا البيولوجي أتكلم وقال بسبب الشعر.. كان بيقولها وهو عادي جدًا.. مش باين عليه الخجل حتى.. وكأنه بيشرح ازاي قرر يرجع جاكت اشتراه.. كمل وقال مفيش ناس كتير في عيلتنا عندهم شعر أحمر.. ف لما اتولدتي كده عملت لك تحليل دي إن ايه.. وطلعتي بنتي 100.. بس في اعتقادنا.. ف مجتمعنا.. الشعر الأحمر يعتبر نذير شؤوم.. إشارة إن العيلة هيحصل لها مأساة ف المستقبل
أمي البيولوجيا هزت راسها بالموافقه وهي بتطبطب بالمنديل على عينيها وبتقول مقدرناش نحلق لك شعرك عشان انتي بنت.. ده كان هيبقى قاسي أوي.. واحنا بالفعل كان عندنا أخوكي واتولد أشقر.. ف كنا عارفين إن الفرص قليلة أوي إن يجي لنا تاني عيل شعره أحمر
ساعتها أبويا البيولوجي ضحك.. ضحك بجد وقال احنا خلفنا 7 عيال.. 2 منهم بس اللي شعرهم أحمر.. ف قررنا إننا منربيكمش معانا.
مج الشاي اللي كان في ايدي وقع مني واتكسر على الأرض.. وكنت بعتذر لهم عن اللي حصل ف نفس الوقت اللي عقلي بيحاول يستوعب يعني ايه أب وأم يتخلوا عن طفلتين عشان لون شعرهم أحمر.. وقاعدين يحتفلوا بالموضوع وكأنه إنجاز محصلش.. وكأنهم نجوا من مصيبة..
كنت بنضف المج الي اتكسر وانا لسه بعتذر.. وبعدها قولت لهم بأهدى صوت ممكن انتوا محتاجين تمشوا وأوعوا تفكروا تتصلوا بيا أو تتواصلوا معايا تاني.. وأنا عارفه إن أكيد اللي أنا عملته غريب جدًا بالنسبالهم.. بس إنهم يتخلوا عن عيالهم أغرب بكتير..
بعد ما مشيوا وهما باين عليهم إنهم حاسين بالإهانة إني حسيت بالإهانة إنهم رموني ف الشارع.. اتصلت بأمي بالتبني وقولت لها كل حاجة.. اخدت عربيتها وجت لي البيت فورًا ومعاها مناديل وبسكوت مخبوز طازه.. حضنتني وأنا بعيط عشان عرفت إن ليا أخت شعرها أحمر في مكان ما أنا معرفهوش اترمت زيي بالظبط..
دلوقتي أنا استعنت بمحقق خاص.. عشان يلاقي لي أختي.. لأن لو عيلتي البيولوجية عايزين يتكلموا عن العيلة اللي بتساعد العيلة.. ف أنا قررت إني ألاقي عيلتي الحقيقية.. الواحده اللي اترمت زيي عشان
