احنا خمس اخوات

احنا خمس أخوات وأنا الأخت الكبيرة.. وبكل بساطة أنا اللي بدير بيت أهلي.. أنا بدرس عشان أخد درجة علمية جديدة.. بشتغل دوام جزئي في نفس مجالي اللي بدرس فيه.. والمفترض إني بعد ما أخلص الدرجة العلمية دي هشتغل بدوام كامل في نفس المكان.. ف عشان كده أنا بعمل دخل كويس جدًا كطالبة.. دخل بيكفيني أدفع مصاريف دراستي وكمان أحوش فلوس..

أخواتي أعمارهم 20.. 17 .. 14.. و10 سنين.. بابا وماما الاتنين بيشتغلوا.. بابا بياخد ورديات إضافية.. وماما بتشتغل من 9 لخمسة في شغل بيرهقها ويوترها جدًا..

ف خمنوا كده مين اللي بيعمل كل حاجة؟؟ أيوه.. أنا.. بعمل كل حاجة في البيت حرفيًا.. بروح أشتري الخضار ومستلزمات البيت كل أسبوع.. بغسل لسبع أشخاص.. بطبخ العشا كل يوم.. وبحضر وجبات الغدا بتاعة الأسبوع كله يوم الحد.. عشان الكل يلاقي أكله جاهز.. حتى المهام اللي المفروض أخواتي بيعملوها أنا اللي بنظمها..

زي إني أتأكد إن في أكل للكلب في البيت عشان أخويا الصغير يقدر يأكل الكلبين.. بوفر كل حاجة لأي حد يحتاجها عشان يعمل اللي عليه.. بحس إني أم لأربع ولاد.. بالإضافة إني بروح الكلية..

في عيد الميلاد اللي فات.. أخيرًا بقى عندي مدخرات تكفيني أشتري لنفسي بلاي ستيشن 5.. كنت عايزة واحد من زمان أوي وأخيرًا لقيت واحد بسعر معقول.. في الوقت ده كنا في 2022

ولو تعرفوا حاجة.. إنك تشتري بلاي ستيشن 5 كان أصعب من إنك تكسب اليانصيب..

باقي عيلتي بتتشارك بلاي ستيشن 4.. موجود في أوضة المعيشة.. بس بتاعي في أوضتي.. ده بفلوسي.. اشتريته بمجهودي.. ولا.. مش هشاركه مع حد..

أخويا اللي عنده 20 سنه بدأ يزن لبابا وماما عن ازاي مش من العدل إن يبقى معايا كل الفلوس دي والحاجات الحلوة ومش بشاركها معاهم..

بدل ما يقولوا له روح اشتغل زيها.. لا بابا وماما ندهوا عليا في المطبخ.. كانوا قاعدين على الترابيزه في اجتماع مصغر.. وكان قرارهم إني لازم أدفع إيجار..

ليه؟ عشان من وجهة نظرهم إنه مش من العدل إني بعمل فلوس كويسه وأنا عايشه في البيت مجانًا.. خصوصًا إني مش بشارك حاجتي اللي بفلوسي مع حد!!

قعدت قدامهم بسمع شرحهم عن كمية الفلوس اللي عايزينها كل شهر!

سكتت خالص وبدأت أعمل الحسبة في دماغي.. بعد ما أدفع الإيجار هيتبقى لي 800 دولار كل شهر.. ده بعد ما اشتري أكلي.. والبنزين.. ومستلزمات الدراسة.. وكل حاجة..

روحت أوضتي وبدأت أحسب على الورق.. لو مأخدتش كام مادة الفصل الدراسي الجديد.. ممكن اشتغل بدوام شبه كامل.. أينعم ده هيطول مدة الدراسة سنة كمان.. بس وقتها هقدر أدفع إيجار بيت خاص بيا..

بالشكل ده هيبقى عندي وقت فراغ زيادة.. ومصاريف أقل من اللي بصرفها في البيت عند أهلي.. واللي بقى مطلوب

مني أعملهم كل الشغل وكمان أدفع لهم إيجار..

ف أخدت القرار.. لميت حاجتي.. كل حاجة بمتلكها حطيتها في عربيتي الهوندا سيفيك.. أينعم الموضوع كان محبط.. إن كل حاجتي من حياتي كانت بالبساطة دي.. بس في نفس الوقت حسيت بحرية..

مقولتش لحد إني ماشيه إلا لما بدأت أحمل حاجتي في العربية..
ماما سألت وهي واقفه قدام باب البيت بروب الحمام "رايحة فين؟"

قولت لها "هاخد شقة لنفسي.. شكرًا أنكم ساعدتوني أعرف إني أقدر أدفع الإيجار"

فضلت أسبوعين في فندق صغير.. لحد ما لقيت شقة.. نقلت فيها.. ظبطت جدول محاضراتي.. أخدت ساعات إضافية في الشغل..

الست صاحبة الفندق.. كانت ست كبيرة في السن اسمها بيفرلي.. فضلت تسألني "انتي كويسة؟" وده لما شافتني بغسل هدومي.. كنت فرحانه عشان بغسل هدوم فرد واحد مش 7..

مش هكدب عليكم أنا اتجننت في تطبيقات المواعدة.. أصل الحياة في بيت مع 4 أخوات وأب وأم حازمين وعندهم قواعد.. كان معناه إني مينفعش أجيب أي حد في البيت أبدًا..

فجأة بقى عندي مكاني الخاص.. كنت حاسه إني أخدت إفراج من السجن.. شقتي كانت صغيرة.. مكونه من أوضة نوم واحدة.. على بعد 15 دقيقة من الكلية.. ماكنتش فخمة بس فيها غسالة أطباق.. وحمام.. وده بالنسبالي كان روعه.. بعد ما كنت بشارك حمام واحد مع 6 أشخاص تانيين..

الصدمة بقى جت فجأة.. بابا وماما قالوا

لجيك – أخويا اللي عنده 20 سنه- إنه لازم يتحمل هو كل مسؤولياتي القديمة..

الغلبان ماكنش مطلوب منه أكتر من إنه يروق سريره.. دلوقتي بقى مطلوب منه التسوق.. الطبخ.. ومتابعة باقي أخواتنا.. أما أخواتي ال3 التانيين.. ف كملوا في المهمات بتاعتهم عادي..

جيك كلمني وهو بيعيط.. حرفيًا بيعيط.. لأنه مبقاش عارف يخرج مع صاحبته ميجان.. عشان بيطبخ في البيت.. وأهلي كانوا رافضين إنها تزوره في البيت وهما مش موجودين.. ف حتى ماكنش لاقي اللي يساعده..

أختي إيما اللي عندها 17 سنه.. بعتت لي رسالة بتقول فيها "أنا بقيت أغسل ل5 غيري كل نهاية أسبوع.. الغسيل بياخد يوم السبت بالكامل"

أخويا اللي عنده 14 سنه كان بينزل يمشي الكلاب مرتين في اليوم.. ويأكلهم ويشتري لهم حاجتهم..

حتى أصغر أخ اللي عنده 10 سنين.. كان غضبان لأنه بقى مجبر يساعد في غسيل الأطباق دلوقتي..

بابا وماما فضلوا يتصلوا بيا كتير عشان يقولوا لي "انتي اتخليتي عننا".. " أنتي أنانية".. بابا حرفيا قال "إنتي بترمي مسؤوليات العيلة.. وإحنا لينا حق في وقتك"

بصراحة الموضوع كان مريب جدًا.. خصوصًا إن بابا نفسه بيشتغل 12 ساعة في اليوم.. وعمره ما عمل أي حاجة في البيت بنفسه..

ف الحقيقة.. أنا حبيت الحياة لوحدي في بيتي..  وحبيت إني بقيت قادرة أشتري اللي أنا عايزاه وأجيب الأشخاص

اللي أنا عايزاهم.. من غير ما أقلق مين هيقولي أيه..تمت

#Dodo