ابني كان بقاله ٨ شهور مرتبط

ابني كان بقاله 8 شهور مرتبط ب ناتالي لما طلب مني يعزمها على عيد الشكر.. هو قالي "معندهاش مكان تاني تروحه في العيد".. وده كان كل حاجة محتاجه اسمعها قبل ما أوافق..

ناتالي كانت هادية لما وصلت.. بس أنا قولت يمكن تكون متوتره عشان أول مرة تقابل العيلة كلها.. بيتي كان فوضى اليوم ده..

حوالي 15 شخص منتشرين في كل الأوض.. أطفال بيجروا ف كل حته.. أخويا بيتخانق على كرة القدم في أوضة المعيشة.. ماما ماشية ورايا ف المطبخ تنتقد كل الأكل اللي بعمله.. يعني العادي ف الأعياد..

لاحظت إن ناتالي كانت بتقف قريب من الأوض.. بتبص من بره على اللي بيحصل بس مش بتشارك بأي شكل.. ابني حاول يخليها تشارك في اللي بيحصل بس هي كانت كل مرة بترجع تقعد جنب الحيطة لوحدها تاني..

لما قولت "العشا جاهز" كلهم جريوا هجموا ع البوفيه والا كأنهم حيوانات مفترسة.. اخواتي ملوا اطباقهم الأول.. كمية أكل رهيبة كأنهم ماكلوش قبل كده.. بعد كده بابا وبعد كده الولاد والباقي كانوا بيتخانقوا على الأكل اللي اتبقى في الصواني..

على ما الصف انتهى وكله اخد اكله وراح ع السفره كان أغلب الأكل الحلو خلاص خلص.. وكنت ملاحظة إن ناتالي مقربتش من الصف تمامًا.. كانت واقفه في زاوية المطبخ جنب التلاجه.. بتتفرج على الكل بياكلوا من باب المطبخ..

رحت ناحيتها وسألتها "حبيبتي.. انتي مش جعانه؟"

ابتسمت ابتسامة صغيرة وقالت

"شوية كده وهاخد حاجة أكلها.. مش عايزه اكل حاجة بتاعة حد منهم"

قولت لها "بتاعة حد مين.. في أكل كتير.. روحي اعملي لنفسك طبق"

قالت "انا بس هستنى لحد ما كل الموجودين يخلصوا.. عادي مفيش حاجة بجد"

حاجة في طريقة كلامها خلتني أحس بضيق ف صدري.. وكأنها سبق وقالت الكلام ده قبل كده آلاف المرات..

روحت ناحية الفرن.. كنت شايله فيه طبق دافي ومتغطي بالفويل.. كنت محضراه من بدري من غير تفكير ليه.. بس كنت حاطه فيه كل الحاجات الحلوة قبل ما حد يلمسها.. صدور الديك الرومي.. البطاطس المهروسة بالصوص.. كسرولة البسلة الخضرا.. لفائف الخضار.. مغرفة كبيرة من فطيرة البطاطا الحلوة بتاعة أمي..

رجعت لناتالي واديتها الطبق ف ايديها.. وقولت "خدي.. انا عملت لك ده"

ناتالي بصت للطبق وكاني اديتها حاجة غريبة وسألتني "ايه ده؟"

قولت لها "ده طبقك.. عملتهولك من بدري عشان متفوتيش أي حاجة في الأكل"

وشها فجأة بقى شكله غريب... دقنها كانت بتترعش.. وبعدها عينيها اتملت دموع.. وقالت "انتي شيلتي لي طبق؟"

قولت لها "طبعًا.. انتي ضيفة في بيتي"

لاحظت إن الطبق كمان بدأ يتهز ف ايديها.. حطته ع الترابيزه جنبها قبل ما دموعها تغرق وشها فجأة.. ماكنتش بتعيط.. كانت منهاره.. جسمها بيترعش جامد.. بتشهق وتتشحتف لدرجة كل اللي قاعدين في أوضة السفرة سكتوا تمامًا لما سمعوا صوتها جاي من المطبخ..

ابني نط من كرسيه

بسرعة لدرجة إن كرسيه وقع ع الأرض.. وسألها "ناتالي ايه اللي حصل؟ مالك في ايه؟".. مقدرتش ترد عليه.. كانت بتعيط لدرجة إنها مش قادرة تاخد نفسها.. بتشهق وتترعش..

ابني بص لي وهو مرعوب وسألني "ماما قولتي لها ايه؟"

رديت عليه "مقولتش حاجة.. انا بس اديتها طبق أكل"

سألني "طب وهي بتعيط كده ليه؟"

جاوبت "معرفش"

حط أيده على كتفها واخدها على أوضته.. قفل الباب وراه.. البيت كله كان ساكت تمامًا..

اخويا بص من السفرة وسألني "ايه اللي حصل؟".. الحقيقة ماكنش عندي إجابة.. ماكنش عندي أدنى فكره ايه اللي حصل..

فضلت واقفه في المطبخ ماسكه ف ايدي فوطة بنضف بيها وبراجع كل حاجة قولتها.. بحاول أعرف ايه اللي قولته أو عملته غلط..

بعد 45 دقيقة ابني خرج من أوضته لوحده.. عينه كانت حمرا كأنه كان بيعيط.. سألته "هي كويسه؟"

قالي "هتبقى كويسة.. هي عايزه تكلمك"

قولت له "تكلمني؟؟ ليه؟ انا عملت ايه؟"

قالي "يا ماما من فضلك روحي كلميها بس لو سمحتي"

روحت ف اتجاه الأوضة وخبطت براحة وقولت "ناتالي.. ممكن ادخل"

سمعتها ردت قالت "اتفضلي"

دخلت لقيتها قاعدة على طرف السرير.. بتمسح وشها بمنديل.. كان شكلها محرج مني.. قالت "انا اسفه جدًا بجد.. انا بوظت لك عيد الشكر تمامًا"

قولت لها "انتي مبوظتيش حاجة.. انا بس عايزه اتأكد إنك كويسه"

قالت "انا محتاجة اشرح ليه كان رد فعلي زي ما شوفتي".. أخدت

نفس عميق وبعدها قالت "انا أصغر واحده بين 6 أخوات.. الفلوس دايمًا كانت قليلة لما كنت صغيرة.. كان حالنا على أده جدًا.. عمر ما كان في أكل كفاية للكل"

قعدت قدامها واستنتها تكمل..

كملت وقالت "بابا كان عنده قاعده ممشيها في البيت.. الولاد ياكلوا بترتيب اللي كان مفيد له أكتر خلال الأسبوع.. اخواتي كانوا أكبر وكانوا بيساعدوه في شغله.. ف كانوا هما دايمًا بياكلوا الأول.. على ما بيجي دوري واوصل للترابيزة عشان أكل غالبًا ما كنتش بلاقي حاجة.. فتافيت ساقعه لو كنت محظوظه"

صوتها اترعش وهي بتكمل "بابا كان بينده عليا ويقولي فتافيت عشان ده كل اللي كنت بطوله.. فتافيت لفتافيت هو كان بيقولي كده والبيت كله كان بيضحك"

حسيت بمراره ف حلقي من اللي بسمعه..

ناتالي كملت وقالت "انا سيبت البيت وانا عندي 17 سنه وعشت لوحدي من ساعتها.. مش بتكلم مع أي حد فيهم من وقت ما سيبت البيت.. بس لسه لحد دلوقتي مش قادرة أجبر نفسي إني اقف في الصف مع ناس تانية عشان أخد أكل.. بستنى لحد ما الكل يخلصوا.. ولو متبقاش حاجة مش باكل"

كانت بصالي بدموع مغرقة وشها "عمري ما حد أبدًا شال لي طبق على جنب قبل كده.. طول حياتي عمر ما حد أبدًا شغل نفسه إذا كنت اكلت وشبعت والا لا"

قمت من مكاني .. وقولت لها "انتي مش فتافيت.. انتي ناتالي.. وطول ما انتي وابني سوا دايمًا هيبقى ليكي طبق على سفرتي"

ناتالي دلوقتي

بقت تيجي في كل عيد وكل مناسبة.. وانا دايمًا بشيل لها طبق على جنب الأول...تمت

Dodo✌