في يوم كنت بعدي الشارع

في يوم كنت بعدي الشارع.. لما فجأة جت عربية وخبطتني.. العربية ماكنتش ماشيه بسرعة والا تخطت الإشارة والا أي مخالفه خطيرة.. الراجل اللي سايق العربية كان بيلف لليمين ومشافنيش ف الممشى بتاع عبور المشاه.. وقعت جامد.. حصلت لي كدمه ف فخدي وجلد كوعي اتخدش جامد جدًا..
الراجل اللي كان سايق وقف فورًا.. وفضل يعتذر كتير أوي واداني كل المعلومات الخاصه بيه.. لما وصلت عربية الإسعاف عملوا لي فحص سريع وقالوا لي لازم تروحي المستشفى عشان يتطمنوا بس إن كله تمام..
اتصلت بجوزي دايل وأنا لسه ف عربية الإسعاف.. قولت له خبطتني عربية وأنا رايحة الطوارئ دلوقتي
أول كلمة قالها ماكنتي انتي كويسه؟ والا أنا جاي لك ف الطريق.. أول كلمة قالها كانت عملتي ايه.. ماشيه طبعًا وسط العربيات زي الهبله
كنت فاكره إنه بيهزر.. ف قولت له لا.. أنا كنت ف ممر المشاه.. والإشاره كانت مقفوله أصلًا
ف رد عليا وقال طبعًا طبعًا أومااااال.. مصدقك.. انتي كنتي مركزه وطبعًا هو اللي غلطان اللي خبطك
قفلت السكة ف وشه.. وبعد ساعة لقيت دايل داخل عليا.. الدكتور ساعتها كان بيشرح لي إن عندي ارتجاج خفيف ف المخ.. ومحتاجة أرتاح..
دايل قاطعه وقال تلاقيها ماكنتش باصه هي رايحه فين.. أصلها هبله بتتشتت بسهوله
الدكتور كان باين عليه الحيرة وقال السواق اعترف إنه كان غلطه.. والشرطة أثبتت ده ف محضر رسمي وهو أكد إنه مشافهاش
دايل أتكلم بسخرية وقال تلاقيها جريت بسرعة من قدامه.. مدتهوش فرصة يشوفها
الممرضة اللي كانت واقفه وبتشوف علاماتي الحيوية وقفت اللي بتعمله

وقالت له يا أستاذ.. مراتك خبطتها عربية..
ف قالها اه.. عشان مش بتركز.. تصرفات كايلا المتوقعة
قعدت ف مكاني.. لابسه طوق تثبيت الرقبة.. الدم لسه على القميص بتاعي.. بسمع جوزي وهو بيقول للفريق الطبي الي بيحاول يلحقني إني أغبى من إني أعدي الشارع..
لما روحنا البيت دايل كمل وقال يمكن دلوقتي تتعلمي تبصي يمين وشمال وانتي بتعدي يا هبله..
قولت له انا كنت على ممر المشاه.. وإشارة المشاه منوره.. 
قالي ده كلامك
قولت له السواق اعترف حرفيًا إنه غلطان.. اداني بياناته كلها وبيانات التأمين بتاعه وهيدفع تمن كل حاجة ف المستشفى
رد عليا تلاقيه بس حاسس بالذنب عشان انتي جيتي قدام عربيته.. سكتت ومردتش ومنستش اللي هو عمله..
بعد أسبوعين دايل اتكعبل وهو نازل من على سلم الدور الأول ف البيت.. وهو شايل سلة الغسيل.. مش حاجة كبيرة.. مجرد انه اتكعبل والسلة وقعت من ايده..
قولت له يا لهوووي.. انت كويس؟ قولتها بأكتر صوت متعاطف عندي.. وكملت ايه يا حبيبي قادر تفهم بقول ايه؟؟ طب دول كام صباع؟؟
رد وقالي انا اتكعبلت.. مش حاجة كبيرة يعني
قولت له الكعبلة دي إشارة على التدهور المعرفي.. احنا لازم نكشف عليك.. طب هو انت نسيت احنا بنستخدم السلالم ازاي؟
رد عليا كايلا بس بقى
قلت له انا بس قلقانه عليك.. الناس مش بتقع كده من غير سبب إلا لو كان في حاجة غلط ف مخها
الأسبوع اللي بعده حرق العشا عشان كان بيتفرج ع التلفزيون وسرح.. دخلت المطبخ وشهقت.. وقولت له دايل يا حبيبي.. انت نسيت النار بتعمل ايه؟؟ بنستخدمها عشان نسخن الحاجات.. تحب اعمل لك جدول بكل حاجة ف البيت فايدتها ايه؟؟
كان باين عليه إنه متضايق من أسلوبي وقال انا سرحت لمدة دقيقة واحدة
قولت له سرحت.. لا ده كده شيء مقلق.. طيب احنا كده محتاجين نكتب ورقة على كل حاجة عشان تعرف ايه فايدتها.. بص ده البوتجاز.. البوتجاز بيسخن.. الحاجات السخنة مينفعش نلمسها
قالي بعصبية بطلي بقى
قولت له انا قلقانه عليك.. الأول السلالم ودلوقتي مش قادر تفتكر أساسيات الطبخ.. تصرفات دايل المتوقعة
بدأ يتعصب جدًا لما بكلمه بنفس الطريقة قدام الناس.. أخوه جه البيت عندنا يتفرج معاه على ماتش ودايل ماكنش لاقي الريموت.. كان تحت مجله.. أنا لقيته فورًا..
وقولت لأخوه تومي.. أنا اعتقد إن دايل محتاج نضاره.. أو يمكن مخه مبقاش قادر يعالج المعلومات المرئية بشكل كويس خلاص
وش دايل بقى أحمر.. وقال الريموت كان مستخبي
قولت له مستخبي؟ تحت مجله واحده؟ تومي اتفرج كده.. دايل البتاع ده اسمه ايه.. كنت ماسكه ف ايدي كوباية
دايل قال بطلي بقى يا كايلا
قولت لتومي هو على طول كده مش مركز.. الموضوع بقى بيتكرر كتير دلوقتي.. بينسى الحاجات الأساسية.. تومي ضحك بإحراج..
القشة الأخيرة كانت ف بيت أهله.. لما دايل كان بيحكي لهم عن اجتماع ف شغله.. وقال تفصيله غلط بخصوص التاريخ بتاع الاجتماع..
ف انا قولت له ف الحقيقة هو كان الخميس.. مش الأربع.. يا عيني يا حبيبي ومديت ايدي مسكت ايده وكملت انت حصلت لك مشكلة النسيان تاني؟
مامته كان باين عليها القلق وقالت مشكلة نسيان؟
قولت لها مبقاش قادر يفتكر أي حاجة مؤخرًا.. من كام يوم نسي ازاي ينزل على السلم.. وبعدها بأسبوع ماكنش فاكر إن البوتجازات سخنه.. دلوقتي مش قادر حتى يفتكر الحاجات بتحصل امتى
دايل ساعتها كان ف قمة غضبه وقال كفاية بقى.. انتي بتعامليني كأني متخلف عقليًا بقالك أسابيع.. 
قولت له وانت مش عارف ليه؟؟ فاكر لما خبطتني عربية؟؟ انت قولت عليا هبله.. قولت إنه غلطي.. تصرفات كايلا المتوقعة.. مش قولت كده؟
باباه وماماته كان باين عليهم الصدمة.. مامته سألته انت قولت كده لمراتك بعد ما خبطتها عربية؟
قولت لها وانا عندي ارتجاج وف المستشفى.. قال للدكتور إني أغبى من إني أعدي الشارع صح
باباه هز راسه وقال له دايل.. ايه اللي هببته ده؟
دايل حاول يبرر الموضوع ماكنش بالسوء ده يعني.. هي بتبالغ
قولت له يا دايل السواق أقر ف محضر رسمي إن كل اللي حصل غلطه.. والتأمين بتاعه غطى كل مصاريف المستشفى والعلاج.. بس انت فضلت مصر إني غبية ومبعرفش أمشي كويس.. ف دلوقتي لما هتعمل أي خطأ بسيط.. أنا هعاملك بالظبط زي ما عاملتني وانا مصابة فعلًا.. ايه رأيك؟؟ حاسس بأيه؟؟
مامته لفت له وقالت له اعتذر لمراتك حالًا
برطم بكلام مش باين غالبًا كان أسف.. بس أنا مبطلتش طريقتي معاه.. كل غلطه عملها وكنت موجوده.. بيبان عليا القلق والتوتر.. بتطمن عن وعيه وتركيزه وفهمه للي حواليه.. وبسأله لو كان فاهم المفاهيم الأساسية والا لا..
امبارح سألني اسيب الأكل أد ايه ف المايكروويف؟
طبطبت على راسه وقولت له لما الجرس يعمل بيييب بيييب ده معناه إن الأكل سخن.. تعرف تقول بييييييب بييييب؟
كان متعصب وعلى وشك ين فجر.. ف قولت له عشان تحرم تقولي يا هبله تاني تمت
Dodo