دخلت اعمل عملية

دخلت أعمل عملية بسيطة من 3 أسابيع.. مش حاجة كبيرة.. دخلت العمليات.. الدكاتره صلحوا اللي محتاج يتصلح وروحت البيت ف نفس اليوم..

كنت بتألم ومرهقه وبحمد ربنا إن الموضوع عدا على خير.. قبل ما أمشي الدكتورة ادتني روشته اجيبها وأنا ماشيه.. كانت عبارة عن كورس صغير من المسكنات الي مش بتتصرف غير بروشته.. لمدة 5 أيام بس.. إجراء طبيعي في الجراحات من النوع اللي عملتها..

حبيبي "ديريك" كان هو اللي بيسوق بيا ف كل المشاوير دي.. احنا كان بقالنا سوا حوالي 8 شهور.. مده كافيه إننا نرتاح لبعض.. بس يمكن مش كافيه إننا نتعلم بعض..

هو كان سبق وقالي قبل كده إن عيلته فيها مشكلة إدمان.. أخوه مر بالتجربة دي وكانت مرحلة بشعة.. احترمت إن الموضوع ده كان حساس بالنسباله.. وعمري ما عملت منه مشكله لأن ماكنش في أي داعي لكده..

لما وقفنا قدام الصيدلية واحنا مروحين البيت.. كنت تقريبًا نايمه على نفسي ف الكرسي اللي جنبه.. اديته الروشته وقولت له يجيبها.. رجع بعد شوية للعربية وحط الكيس بتاع الدوا ف الكرسي اللي ورا وساق بينا للبيت من غير ما يقول والا كلمة.. مفكرتش كتير يعني ف الموضوع.. هو كان شكله عادي.. طبيعي..

ف اليوم ده بالليل لما المسكنات اللي أخدتها ف المستشفى تأثيرها راح.. والألم زاد.. طلبت منه يديني الدوا بتاعي.. ف سكت.. سكوت مش عادي.. وكأنه بيفكر هيقول ايه.. 
وبعدين

قالي "انا لازم أبقى صريح معاكي.. انا مجبتش الدوا.."

سألته "يعني ايه؟"

قالي "انا دورت ع الدوا أون لاين وأنا مستني دوري ولقيته مسكن ف قررت ف ساعتها إني مش هسيبك تاخديه"

افتكرت نفسي مسمعتش صح.. ف طلبت منه يقول نفس الكلام تاني.. ف كرر الكلام تاني.. بنفس الطريقة وهو هادي تمامًا.. وكأنه عمل لي جميله ومستني إني أفهم واشكره..

قولت له "الدوا ده كان مكتوب بروشته.. الدكتوره اللي كتبتهولي.. انا لسه طالعه من عملية.. وبتألم بجد"

هز راسه وكأنه بالفعل فكر ف كل وأي حاجة ممكن أقولها من قبل كده.. ومحضر إجابات لأي كلام هقوله.. ف قالي "اخويا برده لما ادمن كانت البداية روشته دكتور برده.. مفيش حد بيعرف إنه بيوقع نفسه ف مشكلة بسبب المسكنات دي إلا لما بيغرس فيها بالفعل.. انا بحبك ومش هسيبك تعملي كده ف نفسك واقف اتفرج عليكي"

سألته "طيب والمفروض أعمل ايه ف الألم اللي انا حاسه بيه دلوقتي؟"

قالي "Tylenol – نوع من الأدوية المسكنه الضعيفة جدًا زي الباراسيتامول عندنا- وترتاحي".. وكأني عيله صغيرة وقعت وجرحت ركبتها..

الليلة دي كانت صعبة جدًا.. ماكنتش قادرة ألاقي وضع مريح أنام عليه من غير ما أتألم.. فضلت كل ما أغفل أصحى.. كل مرة بتحرك بحس كأن في حاجة جوايا بتتقطع..

ديريك كان نايم والا على باله.. وبيشخر.. ف وقت من الأوقات قمت عشان اخد Tylenol تاني وهو ساعتها فاق

من نومه لمدة ثواني وقالي "برافوا يا حبيبي" واتقلب نام تاني..

تاني يوم الصبح كنت تعبانه ومتعصبة.. قولت له "انا هكلم الدكتورة تكتب لي الدوا مرة تانية وهروح أجيبه بنفسي المرة دي"

قالي "انا فكرت ف اللي انتي بتقوليه ده واعملي حسابك لو عملتي كده أنا مش هقدر أكمل ف العلاقة دي.. لأن ده معناه إنك مش بتحترمي حدودي وتحديدًا اللي ليها علاقه بالأدوية واستخدامها بطريقة غلط ف بيتي"

خليني بس أوضح اللي هو عمله.. هو قطع الروشته بتاعتي القديمة.. قالي إني ماليش الحق أطلب روشته جديدة واجيب الدوا مرة تانية.. وبعدين اعتبر إني لما أخد الدوا اللي المفروض أخده بالطب والقانون.. ابقى بنتهك حدوده..

اتصلت بالدكتورة برده.. الدكتوره ماكنتش هاديه خالص.. طلبت مني أشرح لها بالظبط اللي حصل.. ولما شرحت لها كل حاجة سكتت بطريقة كانت مختلفه تمامًا عن الطريقة اللي ديريك سكت بيها وهو بيصارحني إنه مجابش الدوا..

لما اتكلمت قالت "اللي حصل ده غير قانوني.. الدوا اللي مكتوب للمريض ده حق للمريض فقط.. مش قانوني إن حد يمنع المريض من الدوا.. أو يلعب فيه أو يحرمه منه بأي شكل.. دي مش منطقه رماديه فيها أقاويل.. ده قانون.. "

ورجعت كتبت لي الروشته مرة تانية وطلبت مني أجيبها من مكان ديريك ميعرفهوش.. وإني أفكر بحرص عن الرسالة اللي الموقف ده بيوصلهالي..

روحت نفس اليوم بعد الضهر اشتريت الدوا.

. لما ديريك كان ف شغله.. اخدت أول جرعة وانا قاعده ف عربيتي قدام الصيدلية.. لأني ماكنتش عايزه استنى ساعة واحده كمان..

قعدت ف مكاني شوية لحد ما بدأت أحس إن الألم بيهدا.. وانا بفكر ف أخر 48 ساعة وازاي وصلت للوضع ده..

لما روحت البيت ديريك سألني "عامله ايه؟"

قولت له "احسن"

ابتسم وكأنه له الفضل ف إحساسي ده.. وانا خليت الدوا بتاعي عند اختي ف بيتها.. وبقيت اروح اخده عندها ف مواعيده.. يعني كنت بكدب ومش بقوله أنا رايحه فين كذا مرة وانا المفروض إني أريح ف البيت عشان أتعافى..

أنا كنت بتعافى من جراحة.. وباخد دوايا ف السر وكأني بخبي حاجة محرجة..

تاني يوم بعد ما خلصت العلاج قررت انهي علاقتي بـ ديريك.. كان مصدوم.. ماكنش فاهم ليه عملت كده وهو عمل ايه غلط.. وفضل يقول "أنا بس كان بحاول احميكي.. انتي المفروض تحمدي ربنا على وجودي لأن أغلب الناس معندهمش حد يهتم بيهم كفاية عشان ياخد لهم القرارات الصعبة.."

قولت له "القرار ف ايه يدخل جسمي ده حاجة تخصني.. مش قرارك.. مش تاريخ أسرتك.. مش خوفك.. قراري أنا.. ".. سيبته ومشيت..

بعت لي رسالة بعد 3 أيام وكتب لي فيها "أنا انقذتك من نفسك.. انتي بس لسه مش قادرة تشوفي ده"

مردتش عليه.. لأني أخيرًا فهمت.. الموضوع عمره ما كان عني.. الموضوع كان عن احتياجه هو لإحساس إنه بيصلح حاجة بالفعل كسرته من زمان أوي.. وأنا ببساطة

كنت الشخص الملائم كفاية إنه يمارس ده عليا.. تمت

#Dodo✌️